Ilinniarnertuunngorniat quliungaangata sisamat ukiut marluk ingerlanerini ingerlariaqqiffiusumik ilinniarnermik aallartitsisarput
Ilinniarnertuunngorniarneq ingerlariaqqiffiusumik ilinniakkanut ingerlaqqinnissamut pingaarnertut piareersarfiuvoq, tassa imaappoq ilinniakkanut naatsunut -, bachelorinngorniarnernut -, professionsbachelorinngorniarnernut kiisalu kandidatinngorniarnernut. Kisitsisini paasissutissani matumani ilinniarnertuunngorniarnermi ukiunik pingasunik sivisussuseqartumi nalunaarsuutit kisimik suliarineqarput.
Ilinniartut 2016-imi ilinniarnertuunngorniarnermik naammassinnissimasut 41 pct.-ii ukiut marluk ingerlanerini ingerlariaqqiffiusumik ilinniarnermik aallartitsisimapput. Tamanna ukiup siuliani naammassinnissimasuniit 3 pct.-inik annertunngitsumik qaffariarneruvoq. Annertussusaalli ukiuni tulleriinni appariartuaarsimavoq, 2008-imili ilinniarnertuunngortunut sanilliullugit 34 pct.-inik appariarsimallutik, tassani ilinniarnertuunngorsimasut 75 pct.-ii ukiut marluk ingerlanerini ingerlariaqqiffiusumik ilinniarnermik aallartitsisimammata.
Inuussutissarsiornermilli ilinniakkanut ingerlaqqittartut 2008-mi 5 pct.-imiit 2016-imi 20 pct.-inut qaffariarsimapput. Ataatsimut isigalugu ukiut marluk ingerlanerini ingerlariaqqiffiusumik ilinniarnermik imaluunniit inuussutissarsiornermik ilinniarnermik aallartitsisartut annertussusaat 2008-mi 80 pct.-imiit 2016-imi 61 pct.-imut appariarsimavoq.
Titartagaq 1. 2003-miit 2016-imut ilinniarnertuut ukiut marluk ingerlanerini ingerlariaqqiffiusumik ilinniakkamik imaluunniit inuussutissarsiornermik ilinniakkamik aallartitsisimasut annertussusaat
Nalunaarut: Ilinniarnertuunngorniarneq ukiunik pingasunik sivisussuseqartoq kisimi pineqarpoq.
Najoqqutaq: Naatsorsueqqissaartarfik- Kisitsisaataasivimmi kisitsisit takukkit (http://bank.stat.gl/UDDTRGU1).
Ingerlariaqqiffiusumik ilinniakkani aallartitsisartut annertussusiisa appariarnerat ilinniarnertuunngortut amerlassusaannut naleqqiullugu naatsorsorneqassaaq. Piffissami 2010-miit 2014-imut ilinniarnertuunngornermiit ukiut marluk ingerlanerini ingerlariaqqiffiusumik ilinniakkamut ingerlaqqittartut annertussusaat allanngorarsimanngilaq. Piffissami pineqartumi ilinniarnertuunngorniarnermik ukiunik pingasunik sivisussuseqartumik naammassinnissiamasut amerlassusaat 56 pct.-inik qaffassimangaluartoq. Imaappoq ilinniarnertuunngortut amerlassusaat qaffangaatsiarsimangaluartoq amerlanerusut ingerlariaqqiffiusumik ilinniarnermik aallartitsisimanngillat.
Titartagaq 2. 2003-miit 2016-imut ilinniarnertuut amerlassusaat
Nalunaarut: Ilinniarnertuunngorniarneq ukiunik pingasunik sivisussuseqartoq kisimi pineqarpoq.
Najoqqutaq: Naatsorsueqqissaartarfik- Kisitsisaataasivimmi kisitsisit takukkit (http://bank.stat.gl/UDDTRGU1).